Wan rekrutmen agensi hemi mekem histori blong openem rod blong ol sisonol woka blong hem blong save travel stret kolo Brisbane, Australia tru long Pekoa Airpot long Santo.
ETM Konsaltensi hemi wan lokal rekruitmen agensi blong sisonal workers prokram we i mekem i posibol blong olgeta we i liv long Santo blong save karem daerek flaet blong wok long Australia, mo bae oli nomo nid blong pas tru long Port Vila mo wet blong oli prosesem ol pepa blong olgeta blong travel.
Letty Hamish long ETM Konsaltensi hemi talem se fes lot blong 5 wokman i leko Santo blong kasem Brisbane long Tasdei moning.
“Tedei hemi namba eleven janwari 2024 we bae mifala i sendem 5 woka i ko daon lo Brisbane, nem blo farm we bae oli ko wok lo hem hemi Jensen Farm,” hemi talem.
“Hemi difren from fastaem oli ko lo Vila blo travel, mekem ol pepa blo olgeta, oli stap lo Santo oli mas ko lo Vila blo mekem ol pepa blo olgeta blo travel lo Vila.”
Hemi wan brek tru long saed blong rekrutmen blong olgeta wok man mo woman blong Vanuatu long noten pat blong kantri we i wantem pat long leba mobiliti prokram long Australia.
“Be hemi festaem lo Santo, blo flaet blo Santo to Brisbane mo hemi wan natural flaet we hemi festaem. Mifala tu mifala i glad.” Mr Hamish hemi talem.
Long saed blong olgeta we i ko wok hemi wan plas from oli save sevem sam mane.
Wan sisonol woka long Sanma provins, John Talkere hemi talem bigfala tankiu lo agensi blong mekem laef hemi isi blong olgeta.
“Mi luk se i isi smol lo mi rather than mi ko stap lo Vila blo spendem VT100,000 o wan manis lo Vila,” Mr Talkere i talem.
Hemi tok moa se hemi isu tu blong hemi save travel direk from Santo kasem Brisbane, Australia.
Olgeta sisonol woka we i travel aot long Tasdei long fes direk or natural flight ia olgeta faev evriwan mo oli ol fes wan blong aot long Sanma provins mo ko direk long Australia.
