Australia bae i openem wan niu rod tru long Pasifik Engagement Visa blong save allowem 3000 pipol long wan yia blong Pasifik kaontri i save go liv mo wok long Australia.
Visa ia we nem blong hem emi Pasifik Engagement Visa, hemi bin pas long Palemen blong Australia long las wik.
Bae hemi folem wan ballot system we hemi minim se plante pipol i save apply be bae i no evri wan i success blong pas tru.
Wetem visa ia pipol i save tekem man o woman wetem pikinini blong go live tugeta long Australia.
Foren minister blong Australia, Penny Wong, i talem se visa ia bae allowem moa pipol blong Pasifik blong muv i go long Australia.
Minista Wong i talem se pipol blong Pasifik i bin mekem fulap contribution lo komuniti blong Australia olsem lida blong komuniti, business pipol, artist mo rugby playa.
Hemi talem se Australia i wantem growum komunity ia long Australia mo Pasifik region mo se visa ia bae allowum klosap neighbour blong Australia oli save singaoutem Australia olsem homeples blong olgeta.
Minista Wong i talem se visa ia mekem niu opportunity blong pipol blong Pasifik mo Timor-Leste blong mekem wok mo study long Australia.
Gavman blong Australia bae hemi toktok long evri Pacific kaontri blong finem sapos oli agri blong pat long niufala program ia.
Praem Minista Charlot Salwai Tabimasmas hemi talem seh bae hemi discusm wetem Counsel blong Minista fastaem, blong save kam ap wetem wan decision concernem program ia.
“Taem bae i kam lo levil blong gavman, mo Counsel blo Ministas, hemi ol isus we bae mi nidim gud consultation, nidim Counsel of Minista, hemi nidim Palemen blo lukluk carefully long hem,” hemi talem.